Eiga forsking om R U S.

Dei siste to åra har eg heldt på med eit doktorgradsprosjekt om rusmiddelbruk. Eg har gjort intervju med folk som brukar (eller har brukt) ulike typar illegale rusmidlar, om deira erfaringar og opplevingar knytt til det. Studien har i hovudsak fokus på bruk av rusmidlar, eller rekreasjonsbruk, for å vere tydeleg på at det ikkje er misbruk og avhengnad som står i fokus.

Eg vil nytte bloggen til å publisere nokre tekstar; refleksjonar, perspektiv, interessante "funn" frå prosjektet. Kommentarar til tekstane eller til temaet vert motteke med takksemd, det same gjeld også tips om litteratur, nettsider etc. Blogging er heilt nytt for meg - så eg både gruar og gler meg til dette..!

Eg har i prosjektet førebels valt å halde fokus på rekreasjonsbruk, slik bruk er noko utbredt i Noreg og me treng meir kunnskap på feltet. Med rekreasjonbruk meiner eg bruk av illegale rusmidlar som liknar måten me vanlegvis nyttar alkohol på - altså til fest og i sosiale lag, for å slappe av og hygge oss. Me veit at rusmiddelbruk er meir utbredt i byen enn i distrikta, meir vanleg blant menn enn kvinner og mest utbredt blant personar i alderen 20-40 år. Hasj er det mest brukte illegale rusmiddelet, etterfulgt av amfetamin og kokain.

Eg trur at meir kunnskap om slik rusmiddelbruk vil vere med å nyansere bilete me har av rusmiddelbrukarar og rusmiddelbruk, og vil vere nyttig i samband med rusrelatert arbeid på ulike nivå.

Til no har eg gjort intervju med 18 personar. Intervjua har gått føre i Årdal i Sogn. Det meste av rusmiddelforskinga elles går føre i dei største byane våre - me veit lite om rusmiddelbruk i andre kontekstar. Kva tyding har plassen for rusmiddelbruken, har plass noko tyding i det heile? Dette er eit tema eg vil arbeide med i avhandlinga mi. Intervjupersonane har vore rause, opne, reflekterte og ærlege - me har snakka om kva erfaringar dei har hatt med ulike rusmiddel; kva dei har brukt og korleis, kva dei gjer når dei er rusa, korleis dei kjenner og opplev rusen, korleis dei handterer å bruke rusmidlar - held dei seg til risiko knytt til rusavhengand og eventuelle skadeverknader?, og vidare kva meining har rusmiddelbruken hatt for dei?

For dei fleste intervjupersonane har rusmiddelbruken gått føre i byrjinga av 20-åra, dei har heldt på med det i nokre år - så har dei slutta. Eg vil skrive meir om dette seinare, men dei fleste skildrar det å slutte med illegale rusmidlar som relativt udramatisk. Alle intervjupersonane har erfaring med å bruke hasj og amfetamin, ein del har også brukt kokain, LSD, fleinsopp, exstacy og diverse pillar (valium, rohypnol etc.). Nokre få har også erfaring med heroin. Alle har fortalt om både positive og negative opplevingar knytt til rusmiddelbruken.

Rusmidlane får dei i tak i - nokre gongar er det enklare enn andre gonger. Fleire av brukarane har også vore seljarar og finansiert eige bruk på den måten. Dei har mykje kunnskap om rusmidlane dei brukar. Dei veit korleis dei skal bruke rusmidlane for å oppnå ynskja rus på ein tryggast mogeleg måte. Rusen kan handle om alt frå å slappe av til å få innhaldsrike og annleis opplevingar. Fleire har nytta internett for å finne informasjon om ulike rusmidlar. Elles er det vanleg å dele erfaringar med venner som også brukar same rusmidlane. Også dette vil eg kome attende til seinare.

Då er bloggen oppe og går - tvi tvi..!